चुलीजवळ अभ्यास करतांना 17 वर्षीय विद्यार्थिनीचा होरपळून मृत्यू

गोंदिया : देवरी पोलीस ठाण्यांतर्गत ग्राम मरामजोब येथील ११ व्या वर्गात शिकत असलेल्या विद्यार्थिनीचा जळाल्याने मृत्यू झाला. चुलीजवळ बसून अभ्यास करीत असताना लागलेल्या आगीत ती गंभीररित्या होरपळली होती. ही घटना शुक्रवार 27 डिसेंबर 2024  ला पहाटे 5:30 वाजताच्यादरम्यान घडली. चांदणी किशोर शहारे (17) असे मृत विद्यार्थिनीचे नाव आहे.
प्राप्त माहितीनुसार, चांदणी ही शिवराम महाविद्यालय मुरदोली ता. देवरी येथील अकराव्या वर्गामध्ये शिकत होती. सध्या  हिवाळ्याचे दिवस असल्यामुळे आणि पहाटेच्या सुमारास थंडीचे प्रमाण अधिकच जाणवत असल्यामुळे थंडीपासून बचाव करण्याकरिता चुलीजवळ बसून ती अभ्यास करीत होती. दरम्यान अचानक लागलेल्या आगीत चांदणी जळाली. गंभीर अवस्थेत तिला प्रथमत: जवळील ग्रामीण रुग्णालय देवरी येथे दाखल करण्यात आले. नंतर गोंदियाला हलविण्यात आले. मात्र, प्रकृती अधिकच खालावल्याने तिला नागपूरला हलवण्यात आले. नागपुरातील मेयो रुग्णालयात उपचारादरम्यान शनिवारी पहाटे  4  वाजताच्या सुमारास  चांदणीचा मृत्यू झाला. तिच्या मृत्यूमुळे गावात हळहळ व्यक्त होत आहे. मृत्यूपश्चात आई-वडील, भाऊ असा मोठा आप्तपरिवार आहे.