राज्य आदिवासी आरोग्य समितीचा पहिल्याच दिवशी नक्षलग्रस्त कावराबाध व मुंडीपार येथे भेटी

गोंदिया : महाराष्ट्र राज्य आदिवासी आरोग्य समितीच्या अध्यक्षा आणि नंदुरबार जिल्हाधिकारी डॉ. मिताली सेठी (भाप्रसे) यांचा गोंदिया जिल्ह्याला दि.19 ते 20 जुलै दोन दिवसीय दौर्याला सुरुवात झाली.यावेळी त्यांच्या सोबत भारतीय प्रशासन सेवेतील अधिकारी श्री.खुश(भाप्रसे) श्री.साई किरण(भाप्रसे) आणि राज्य कार्यक्रम व्यवस्थापक महीला व बालकल्याण दिग्विजय शिंदे यांचा समावेश होता.
दौर्‍याची सुरुवात शासकीय वैद्यकीय महाविद्यालय आणि केटीएस सामान्य रुग्णालय येथील भेटीने झाली.यावेळी शासकीय वैद्यकीय महाविद्यालयाचे अधिष्ठाता डॉ.कुसुमाकर घोरपडे, जिल्हा शल्यचिकीत्सक डॉ.पुरुषोत्तम पटले व जिल्हा आरोग्य अधिकारी डॉ.अभिजीत गोल्हार यांचेशी भेटुन आदीवासी व नवसंजीवनी कार्यक्षेत्रातील गावात आरोग्य सेवा देताना अडीअडचणी तसेच आदिवासी आरोग्याशी संबंधित मुद्द्यांवर सविस्तर चर्चा करण्यात आली.सर्व प्राध्यापक व विभाग प्रमुखांनी आरोग्य सेवेत सुधारणा करण्यासाठी आपल्या शिफारसी दिल्या. यानंतर पथकाने आदिवासी व नक्षलग्रस्त सालेकसा तालुक्याची भेट घेतली. प्राथमिक आरोग्य केंद्र कावराबांध येथे बाल विकास प्रकल्प अधिकारी,अंगणवाडी सेविका,आशा सेविका व आरोग्य कर्मचाऱ्यांसह संवाद साधून आदिवासी आरोग्य समस्यांवर विस्तृत चर्चा झाली.त्याचबरोबर कावराबांध व मुंडीपार येथील आदिवासी वाड्यांमध्ये गरोदर माता व बाळंतिणींच्या घरी भेटी देऊन त्यांना देण्यात येत असलेली आरोग्य सेवा प्रत्यक्ष पाहण्यात आली.तसेच त्यांचे संवाद साधुन आलेल्या अडचणी बाबत त्यांचे मनोगत घेण्यात आले.
डॉ.मिताली सेठी यांनी गावात जाऊन कार्यक्षेत्रातील स्थानिक लोकप्रतिनिधी जिल्हा परिषद सदस्य तथा आरोग्य समिती सदस्य छायाताई नागपुरे यांच्याशी भेटुन होत असलेल्या अडीअडचणी व समस्या तसेच त्यावर प्रतिबंधात्मक उपाययोजनावर चर्चा केली. ग्रामस्थ व शाळकरी मुलांशी संवाद साधला.यावेळी त्यांनी स्थानिकांची जीवनशैली, अन्न-खाद्य सवयी, आरोग्यविषयक पारंपरिक पद्धती, सण-समारंभ व सामाजिक रचना समजून घेण्याचा प्रयत्न केला.
यावेळी डॉ.सेठी यांनी आदिवासी भागांतील आरोग्य सेवा सर्व स्तरावर अधिक सक्षम करण्याचे निर्देश संबंधित अधिकाऱ्यांना दिले.दौर्‍यावेळी आरोग्य विभाग, महिला व बालकल्याण विभाग, आदिवासी विभाग व शिक्षण विभागाचे अधिकारी व कर्मचारी उपस्थित होते त्यात प्रामुख्याने जिल्हा आरोग्य अधिकारी डॉ.अभिजित गोल्हार,जिल्हा शल्यचिकित्सक डॉ.पुरुषोत्तम पटले,अतिरिक्त जिल्हा शल्यचिकित्सक डॉ.तृप्ती कटरे,सहाय्यक जिल्हा आरोग्य अधिकारी डॉ.अरविंदकुमार वाघमारे,जिल्हा माता व बाल संगोपन अधिकारी डॉ.रोशन राऊत, जिल्हा साथरोग अधिकारी डॉ. निरजंन अग्रवाल, जिल्हा हिवताप अधिकारी डॉ.विनोद चव्हाण,बालकल्याण विभागाचे उपमुख्य कार्यकारी अधिकारी किर्तीकुमार कटरे,बाई गंगाबाई स्त्री रुग्णालयाचे डॉ.पवन राऊत,सालेकसा तालुका आरोग्य अधिकारी डॉ.स्वप्नील आत्राम,वैद्यकीय अधिकारी डॉ. अमित कोडनकर यांचा समावेश होता. हा दौरा गोंदिया जिल्ह्यातील आदिवासी भागांमधील आरोग्य सेवांचे वास्तव जाणून घेण्यासाठी व त्या अनुषंगाने सुधारणा सुचवण्यासाठी अत्यंत महत्त्वाचा होता.