गोंदिया : ग्रामविकास व पंचायत राज विभागांतर्गत महाराष्ट्र राज्य ग्रामीण जीवनोन्नती अभियान (उमेद) च्या वतीने दि.17 ते 21 फेब्रवारी 2026 दरम्यान इंदिरा गांधी स्टेडियम गोंदिया येथे ‘पलाश मिनी सरस’ प्रदर्शनीचे आयोजन करण्यात आले आहे. या प्रदर्शनाला जिल्हाधिकारी प्रजित नायर यांनी शुक्रवारी भेट दिली.
ग्रामीण भागातील महिला बचत गटांच्या कलागुणांना आणि त्यांच्या उत्पादनांना हक्काची बाजारपेठ मिळवून देणारा हा उपक्रम कौतुकास्पद असल्याचे प्रतिपादन त्यांनी यावेळी केले. हस्तकला व गृहउपयोगी वस्तू, महिलांनी तयार केलेल्या आकर्षक वस्तू, बांबूकाम आणि विणकाम साहित्याची त्यांनी पाहणी केली. यावेळी त्यांनी जिल्ह्यातील विविध तालुक्यांतील अस्सल खाद्यपदार्थांचे स्टॉल्स, सेंद्रिय तांदूळ, मसाले आणि वनोपजांपासून बनवलेल्या वस्तुंची प्रत्येक स्टॉलवर जाऊन महिला बचत गटांच्या सदस्यांशी संवाद साधला. त्यांच्या उत्पादनांची निर्मिती प्रक्रिया, पॅकेजिंग आणि विक्री व्यवस्था याबद्दल माहिती जाणून घेतली. यावेळी जिल्हा ग्रामीण विकास यंत्रणेच्या प्रकल्प संचालक प्रमिला जाखलेकर, जिल्हा अभियान व्यवस्थापक नरेंद्र रहांगडाले व नागरिक उपस्थित होते.