12 वर्षीय मुलाच्या संशयास्पद मृत्यूने नागपुरात खळबळ
नागपूर : गच्चीवरील शिडीला गळफास घेतलेल्या स्थितीत बारावर्षीय मुलाचा मृतदेह आढळून आल्याने सोमवारी क्वॉर्टर परिसरात एकच खळबळ उडाली. अग्रण्य सचिन बारापात्रे (रा. सोमवारी क्वॉर्टर) असे या मृत मुलाचे नाव आहे. ‘यू-ट्युब’वरील ‘स्कार्फ फेस कव्हर चॅलेंज’मुळे या मुलाचा जीव गेला असावा, असा प्राथमिक अंदाज वर्तविण्यात येत आहे.
ही घटना २५ जानेवारी रोजी संध्याकाळी ६ वाजताच्या सुमारास समोर आली. अग्रण्य हा इयत्ता आठवीतील विद्यार्थी असल्याचे कळते. तो लाठी-काठी चालविण्यास शिकत होता. या खेळात त्याने प्रावीण्य प्राप्त केले होते व तो राष्ट्रीय स्तरावरील खेळाडू होता, अशी माहिती आहे. मात्र, तो अतिशय चंचल होता व त्याला मोबाइलचे व्यसन होते, असे सांगितले जात आहे. त्याच्या या चंचल वर्तनावर उपचार करण्यासाठी त्याच्या पालकांनी मध्यंतरी एका मानसोपचारतज्ज्ञाचीही मदत घेण्याचे कळते.
काय आहे खेळ?
अग्रण्य सतत मोबाइलवर असायचा. यात प्रामुख्याने यू-ट्युबवरील व्हिडीओज बघण्याची सवय त्याला होती. यावरील ‘स्कार्फ फेस कव्हर चॅलेंज’बाबतचे व्हिडीओज तो सातत्याने बघत होता, असे पुढे आले आहे. या व्हिडीओजनुसार, पूर्ण चेहऱ्याला स्कार्फ बांधून एखादी कृती करायचे आव्हान स्वीकारायचे व ते पूर्ण करायचे प्रयत्न केले जातात. हेच चॅलेंज अग्रण्यने घेतले असावे, असा प्राथमिक अंदाज आहे. तो २५ जानेवारी रोजी संध्याकाळी ५ वाजताच्या सुमारास शेजाऱ्यांच्या गच्चीवर खेळायला गेला. बराच वेळ तो परत न आल्याने त्याचे कुटुंबीय त्याला शोधण्यासाठी या गच्चीवर गेले असता तेथील लाकडी शिडीला ओढणीने गळफास घेतलेल्या स्थितीत त्याचा मृतदेह आढळून आला. हे चॅलेंज करताना काहीतरी चुकल्याने त्याला गळफास बसला असावा, असा तर्क लावण्यात येत आहे. तूर्त पोलिसांनी याप्रकरणी आकस्मिक मृत्यूची नोंद केली आहे.
रवि ठकरानी ( प्रधान संपादक)
93593 28219